Алинә Сафиуллина Дилә Нигъмәтуллинага үпкәләгән: "Аның сүзләрендә хаклык бар иде"
Татар эстрадасы җырчысы Алинә Сафиуллина Дилә Нигъмәтуллина белән бергә сөйләшеп утырганын искә төшереп, аның "Җырчы бары тик үзенең җыры булса гына үз йөзен булдыра ала", - дигән фикерен Инстаграм битенә язган.
“Монннан 10-12 еллар элек, әле җырлый гына башлаганда, мин бәйрәмнәрдә, мәҗлесләрдә, концертларда я халык җырлары, я башка олырак җырчыларның җырларын җырлый идем. Алай җайлы, очсыз.
Шуннан берзаман сабантуй бәйрәмендә Дилә Нигъмәтуллина белән бергә эшләргә туры килде. Икебез дә КГУКИда (Казан дәүләт мәдәният һәм сәнгать институты – ИТ) укыгангамы икән, чыгышыбызны көткәндә озаклааап сөйләшеп утырдык! (Арча районы иде бугай)
Шунда мин җырлап кергәч, Дилә миңа әйтеп ташлады: “Мин гел үз җырымны булдырырга тырыштым! Җырчы бары тик үзенең җыры булса гына, үз йөзен булдыра ала, минемчә”, - дип. Мин эчтән бераз үпкәләдем, әлбәттә, әмма аның сүзләрендә хаклык бар иде. Шул көннән мин репертуарыма өр-яна үземә генә дип иҗат ителгән җырлар туплый башладым.
Үз җырыңны халыкка чыгаруы авыр диючеләр бар, әмма ничек рәхәт, сине бары син тамашачыга җиткергән җырдан танысалар! Ә халык җырлары - алар барыбер җырлана, онытылмый! Без аларны яңартып җырлыйбыз. Әмма алар барыбер, беренче башкарган җырчының иҗат җимеше булып кала, миңа калса”, - дигән Алинә Сафиуллина.