Алимә Сафина авариягә эләккән
Татар эстрадасының яшь җырчысы Алимә Сафина юл һәлакәтенә юлыккан. Әлеге күңелсез хәл бүген берничә сәгать элек булган.
“Лаеш районының Комлы Кавал авылыннан чыгарга торганда, ак төстәге “ундүртле” машинама хатын-кыз идарәсендәге Renault Duster машинасы бәрелде. Барысы да шулкадәр тиз һәм кинәт булды, аңламыйча да калдым. Нәкъ мин утырган яктан бәрелде. Үземә зыян килмәде, Аллага шөкер. Гөнаһ шомлыгына, бу юл чатында светофор эшләми”, - ди Алимә.
Җырчы сүзләренчә, авария ясаган хатын-кыз шундук үз гаебен таныган. “Ике сәгать көткәч, ЮХИДИ хезмәткәрләре дә килде. Хәзер менә юл һәлакәтен теркибез”, - белдерде Алимә Сафина. Җырчының машина йөртү таныклыгы алганына 7 ел, руль артында исә 4 ел йөри.
