Әлфинә Әзһәмова үзенең легендар «Онытмаган» җырын яңарткан. Ул аны Элвин Грей белән дуэтта башкарачак. Җыр шушы көннәрдә дөнья күрә. «Онытмаган» – инде тарих. Һәм без аны бик тиздән яңадан язачакбыз», – дип тәкъдим итте ике артист. Алар җырга рилс яздырган.
Әлеге яңалыкка реакцияләр дә бик күп булган. Санаулы сәгатьләр эчендә 500дән артык комментарий язып калдырганнар.
Язылучыларының бер өлеше артистларны мактый, рәхмәт сүзләре җиткерә. «Искиткеч. Кечкенә чагымда әни бу җырны башкара иде. Хәзер исә үзем тыңлап йөриячәкмен. Рәхмәт сезгә», «Шәп дуэт килеп чыккан. Мин сезнең өчен шат», «Яңартуыгыз әйбәт булган. Яшьләр элекке авторларны да беләчәк», – диләр.
«Нигә балачак җырыбызны боздыгыз?», «Әлфинә апага да барып җиткән инде...», «Әлфинә апа бу җырны Радиктан башка матуррак җырлый. Гафу, ләкин бу минем фикер. Элекке версиясе шәп бит», «Бу җырны яңартып яздырырга кирәкми. Оригиналына тиңнәр юк», «Тиздән әлеге җырны бүлешә башлаячаклар. Уразова очрагындагы кебек», – дип тәнкыйтьләүчеләре дә күп булган.
Әлфинә Әзһәмованың инде күптән атказанган исеме алырга лаек артист булуын да билгеләп үткәннәр.