Алексеевск Түбән Тигәнәле авылы имамы махсус операциядәгеләргә бармакчалы бияләйләр бәйли

Алексеевск районы Түбән Тигәнәле авылы имамы Габделхәй абый Сабиров махсус операциядә катнашучы хәрбиләргә бармакчалы бияләйләр белән оекбашлар бәйләп озаткан. Хәзер дә буш вакытын әрәм итми, кышка кергәнче дип, тизрәк җылы әйберләр бәйләргә тырыша. Бияләйләрне исә хәрбиләр өчен махсус җайлаштырып бәйли. Бу хакта «ВКонтакте» социаль челтәрендәге «Подслушано татарлар» төркемендә хәбәр ителә.

– 1 ел эчендә 60ар пар бияләй белән оекбаш әзерләп җибәрдек. Бу игелекле эшкә үзебезнең һәм күрше авыллардагылар да кушылды. Бәйләү җепләрен кибеттән дә алабыз, Казаннан волонтерлар оешмасы да җибәрә. Бияләй белән оекбаш эченә: «Исән-сау йөреп кайтыгыз, Габделхәй абыегыздан сәлам», – дип кыска гына хатлар да салып куябыз. Ничек тә ярдәм итәсебез килә, кулдан килгәнчә, булдыра алганча булышабыз, – дип сөйләгән Габделхәй абыйның хатыны Гөлнур апа.