«Аларны сәхнәгә чыгарыгыз!» — Салават һәм Гүзәлем сәер бәйрәм уздырган
Иҗади гаилә туганнары белән табын артында сыйланып утырган видео куйган.
Салават һәм Гүзәлем кызларын күкрәктән аеруны бәйрәм иткән. Бу хакта Салават Миңнеханов Инстаграм сәхифәсендә хәбәр итә.
Ул туганнары белән өстәл артында сыйланып утырган видео куйган. Ул ике бертуганы, племяниклары, киленнәре белән таныштыра. Аннары «әйдәгез, мине, Гүзәлемне һәм Мәдинәне котлыйбыз», — дип әйтә. Бу туганнар белән очрашу һәм котлаулар Мәдинәне күкрәк сөтеннән аеру уңаеннан булган икән.
Инстачыларны яңа бәйрәм аптырашта калдырган:
«Китте бит әй бәйрәмнәр: туган көн, күкрәк капкан көн, күкрәктән аерган көн. Вәт дөнья, коронавирус халыкны нишләтте. Артисларыбыз акылдан шаша башлады. Әй Хода, чыгарыгыз, зинһар, аларны сәхнәгә»;
«Андый бәйрәм дә бармыни?»;
«Мактанчык».
Әлбәттә, матур теләкләр теләүчеләр, аларның гаиләсенә соклануларын белдерүчеләр, туганнар белән җыелышырга сәбәп табулары өчен мактаучылар, Мәдинәгә иптәш кирәген искәртүчеләр дә бар.
Гүзәлем үзе дә сториста күкрәк сөтеннән биздерү процессы турында тәмләп сөйләде. Кызыл борычның ярдәме тигән икән. Мәдинә бер кабып караган да, шуннан башка ими сорамаган. Нәни кызчык тәмам онытсын өчен аны ике көнгә Гүзәлемнең әти-әнисендә калдырганнар.