Бүген Алабугада Хәтер мәйданында Украинадагы махсус хәрби операциядә һәлак булган Владимир Луговин белән хушлаштылар. Бу хакта Алабуга районының рәсми сайтында хәбәр ителә.
«Ул хәрби бурычын үтәп, безнең гаиләләрне, үз шәһәрен, илебезне яклап һәлак булды. Батыр хәрби, фидакарь солдат. Яраткан ул, ир һәм әти. Без аны шундый килеш истә калдырырбыз һәм, Ватан сакчысы буларак, исемен сакларбыз», – диде Алабуга районы башлыгы Рөстәм Нуриев.
Үз ягыбыздан, без якын кешесен югалткан гаиләне кайгыртырга сүз бирәбез, диде район башлыгы.
Хәрбинең ничек һәлак булуы һәм аның хәрби хезмәтне нинди шартларда узуы билгеле түгел. Kazanfirst басмасы мәгълүматлары буенча, Владимир Луговин махсус хәрби операция зонасына июньдә киткән. Аның 3 баласы калган. ТНВ сайты редакциясе батырларча һәлак булган татарстанлының туганнарының һәм якыннарының кайгысын уртаклаша.
