Фирдүс Тямаев үзенең концертларында тамашачысын гаҗәпкә калдыруын дәвам итә. Тямай тамашачысы аның хәтта акырып кычкыруын да көлеп кенә кабул итә. Шундый тагын бер күренешне ул социаль челтәрдә күрсәтте.
Видеодан күренгәнчә, концерт ахырына якынлаша. Фирдүс Тямаев тамашачысына йөрәгеннән чыккан киңәшләрен әйтә, «яратыгыз бер-берегезне, яратыгыз» дип салмак кына сөйли. Шул мизгелдә ул тавышын бөтенләй үзгәртеп: «Туктале!» – дип акырып җибәрә. Халык шул бер сүздән көләргә тотына.
Тямайның концертын шулай бетерәләрмени... Барыгыз, чыгыгыз! – дип куа башлый ул сәхнәдән хезмәттәшләрен. Аннары тамашачыга:
Бастык! – дип команда бирә. – Басыгыз! Барыбыз да бастык! Шулай бетерәләрмени концертны? Ничек каршы аласыз әле сез?
Халык, җавап итеп, дәррәү кубып, кул чаба башлый.