Кариев исемендәге яшь тамашачы театры артистлары Рузанна һәм Илназ Хәбибулиннар гаиләсендә куанычлы вакыйга – иҗади гаилә өченчегә әти-әни булды.
Бу хакта социаль челтәрләрен актив алып баручы Рузанна үзенең сәхифәсендә хәбәр итә.
«Сезнең белән элемтәдә күпбалалы әни Рузанна Хәбибуллина. Беренчедән, барыгызга да зур рәхмәтләребезне әйтәсебез килә. Шундый матур теләкләр, котлаулар язасыз. Меңләтә үзегезгә әйләнеп кайтсын. Безнең барысы да яхшы. Ашыйбыз, йоклыйбыз», – дип сөйләгән ул.
Рузанна һәм Илназ Хәбибуллиннар гаиләсендә бер малай һәм кыз үсә. Яңа туган сабыйларының кызмы, малаймы икәнлеген пар әлегә хәбәр итмәгән.
Хәбибуллиннар гаиләсен чын күңелдән котлыйбыз. Сау-сәламәт, бәхетле сабый булсын!