Актанышта ике эшче трактор чүмеченә утырып, юлга ком сибеп йөргән
«Коммунсервис» директоры вазифаларын башкаручыга карата хезмәтне саклау кагыйдәләрен бозган өчен административ эш ачканнар.
30 ноябрьдә Актаныш урамында трактор чүмеченә ике эшче утырган һәм юлга ком сибеп йөргән. Актаныш прокуратурасы ачыклаганча, алар «Коммунсервис» оешмасында эшли. Бу турыда «Татар-информ» хәбәр итте.
Хезмәтне саклау кагыйдәләре буенча, төяү-бушату эшләре вакытында погрузчик чүмеченә утырырга ярамый. Тикшерү нәтиҗәләре буенча, ведомство «Коммунсервис» директоры вазифаларын башкаручыга карата хезмәтне саклау кагыйдәләрен бозган өчен административ эш ачкан.
Тикшерү материалларын Татарстан буенча Хезмәт дәүләт инспекциясенә тапшырганнар. Бу турыда Татарстан прокурорының өлкән ярдәмчесе Руслан Галиев хәбәр итте.
