Актаныш мәктәбендә ата-аналар балаларын татарча укытуга каршы чыкканнар
Татарча укытуга каршы чыккан әнине хуплап, башка ата-аналар кул чаба.
Актаныш башлыгы Энгель Фәттахов район үзәгендәге 2нче санлы мәктәптә укытуны татарчага күчерергә тәкъдим белән чыккан.
Бу очрашудан видео мессенджерларда тарала.
«Актанышта да булмаса, кайда булырга тиеш?» — ди ул ата-аналар белән очрашуда.
Бер ана татарча укытуга каршы чыккан.
«Кертсеннәр шәһәрдә. Нигә кирәк Актанышта? Сез өлкән классларда русча укуга күчәбез, дисез. Ул бала татарча укый-укый да, ничек русчага күчә соң ул? Авыл балалары ничек имтихан, БДИ бирәләр?» - дип сорагач, калган ата-аналар, бу әнине хуплап, кул чаба.
Ана дәвам итә: «Нигә без балаларыбызны ниндидер тәҗрибә үткәрү өчен бирергә тиеш? Без тапканбыз икән ул балаларны, алар өчен җавап бирәбез, киләчәген дә без уйларга тиеш. Татарча укысын-укысын да, шәһәргә китеп, югары уку йортына керә, ул бала ничек укый соң анда?»
