Аксубай районы башкарма комитеты җитәкчесе Алмаз Мингулов ТР Инвестицион үсеш агентлыгында узган «Муниципаль сәгать»тә муниципалитеттагы икътисади күрсәткечләр турында сөйләде. Аның сүзләренә караганда, районда уртача айлык хезмәт хакы 64,4 мең сум тәшкил итә, бу – узган елның шушы чоры белән чагыштырганда 35 процентка күбрәк. Районда эшсезлек дәрәҗәсе иң түбәннәрдән – 0,16 процент. Бу хакта «Татар-информ» хәбәр итә.
«Хезмәт хакы үсеше беренче чиратта авыл хуҗалыгы предприятиеләре хисабына тәэмин ителде. Җәйге чорда, бигрәк тә урып-җыю чорында, авыл хуҗалыкларында хезмәт хаклары сизелерлек артты», – диде Алмаз Мингулов.
Ул районның хезмәт потенциалын формалаштыруга Аксубай универсаль технологияләр техникумының зур йогынты ясавын әйтеп узды. Учреждениедә Аксубай, күрше районнардан һәм башка төбәкләрдән 360 студент белем ала.
«Безнең бурыч – егетләрне район предприятиеләрендә калдыру. Бу юнәлештә ТР Мәгариф министрлыгы белән берлектә системалы эш алып барыла», – диде Мингулов.
Ул шулай ук хәбәр иткәнчә, быел техникумның яңа укыту-җитештерү корпуслары төзелә башлаган. Проект 360 млн сум күләмендә бюджет финанславы белән 2 этапта гамәлгә ашырыла. Беренче этап инде ахырына якынлаша, диелә хәбәрдә.
