«Ак Барс» хоккей клубы һөҗүмче Григорий Денисенко белән бер еллык килешү имзалады

«Ак Барс» хоккей клубы 25 яшьлек һөҗүмче Григорий Денисенко белән дә килешү төзеде. Контракт 2026 елның 31 маена кадәр исәпләнгән.

Денисенко узган сезонны Америка Кушма Штатларында – «Вегас Голден Найтс» һәм «Милуоки Эдмиралс» кебек командаларда чыгыш ясап үткәрде.

Үз карьерасында хоккейчы Милли хоккей лигасында 34 матч үткәреп, 7 тапшыру ясады. Американың АХЛ лигасында ул 5 сезон чыгыш ясап, 243 уенда 159 очко (64 гол һәм 95 пас) туплады.

Континенталь хоккей лигасында Денисенко 79 матчта катнашып, 22 очко (11 гол һәм 11 тапшыру) җыйды.

• Григорий Денисенко – Новосибирск шәһәрендә туган, аңа 25 яшь. Ул «Локо-Юниор» (2016-2017), «Локо» (2016-2018) һәм «Локомотив» (2018-2020) яшьләр командаларында чыгыш ясады. Шулай ук «Лада» (2018), «Флорида» (2021-2023), «Вегас» (2023-2025) һәм «Нэшвилл» (2025) клублары системаларында уйнаган. Уенчы 2020 елгы яшьләр дөнья чемпионатында – көмеш, 2019 елгы ярышларда бронза медале яулады. Денисенко 2 тапкыр Харламов кубогын (2018, 2019) һәм яшьләр клублары арасында дөнья кубогын (2018, 2019) отты. Моннан тыш, ул 2016 елда яшүсмерләр Олимпия уеннарында бронза призеры булды.