Танылган алып баручы Айваз Садыйров зәңгәр экраннарда күренергә хыялланучы кешеләр өчен телевидениегә эләгүнең нәтиҗәле, шаян методикасы белән уртаклашкан.
«Телевидениегә ничек эләгергә? Ничек ТНВда тапшыру алып баручысы булып китәргә?
Телеканалга әзерлексез эләгеп булмый, аңа энергетик, психологик һәм менталь дәрәҗәдә әзерләнә башларга кирәк. Ничек соң ул? Бүлешәм.
Беренчедән, Илшат Әминовның кечкенә генә портретын автомобиль панеленә ябыштырып куегыз. Өчәү булса, тагын да яхшы. Машинада да начальник күреп тора икән дигән хис уяна башласын үзегездә.
Икенчедән, булачак хезмәттәшләргә ияләнә башларга кирәк. Ким дигәндә, исемнәренә. Шуңа этегезнең исемен Җәвиткә, мәчегезнекен Рафилгә үзгәртү комачауламас.
Телевидение - ул камера алдын эшләү. Камера каршында сөйләргә өйрәнегез. Барыгызның да өйләрендә профессиональ камера юктыр, беләм. Шуңа суыткыч камерасыннан башларга мөмкин.
Һәм иң мөһиме! ТНВ ул камил булган татар сүзләре альма-матеры. Үзегезнең сүзлек запасын нәкъ тә ТНВда баручы татар сериаллары өйрәткән сүзләр белән тулыландырыгыз - тутыкам, изге атакай һәм башкалар.
Менә шушы методиканы кулланып, 6 ай чамасы әзерләнсәгез, сез рухи рәвештә ТНВда эшләргә әзер булырсыз. Аннан соң эшкә урнашу - техника эше, иң җайлысы. Анысын язып тормыйм.
Сорауларыгыз калган булса, языгыз, җавап бирәм», – дигән Айваз Садыйров ВКонтакте челтәрендә.