Айваз Садыйров татар эстрадасы турында: «Кыюлар бар. Әмма бармак белән санарлык»

Алып баручы Айваз Садыйров «татар эстрадасы вәкилләренә кыюлык җитми» дигән фикердә. Бу хакта ул «Айваз радиосы» телеграм-каналында яза.

«Безнең сәхнә вәкилләренә кыюлык җитми. «Пошлость» белән бутыйсы түгел.

Кыюлар бар. Әмма бармак белән санарлык… Кыюлык – «поезддан алдан» чабу, заман сулышын, вайбын тою.

Гадәттә офыкта бер кыю барлыкка килә дә, «менә болай да эшләп була бит, иптәшләр» дип әйтә. Күрсәтә.

Калганнар: «Ә-ә-ә-ә... Карале, шулай икән, әйдә, без дә шулай эшлик», – диләр дә, теге кыюны кабатлый башлыйлар. Төрлечә кабатлыйлар. «Точь в точь» кабатлыйлар. Уздырам, дип кабатлыйлар. Мин башкалардан аерылам, дип кабатлыйлар.

Сәхнә ул – матурлык, яңалык, заман чагылышы һәм... үз стилеңне дөрес тоеп, кабатланмыйча, сокландыру, артыңнан ияртү, беренче булу.

Башкалар «поездның кайсы вагонына эләгим икән» дип чапканда, ул «локомотивның алдыннан» бара.

Минем үземә бу позиция якын. Тирә-якка бераз киңрәк карарга, тирәнрәк багырга яратам. Заман сулышын, вайбын тоярга тырышам.

Сулышны тойган урында конкрет идеялар, гамәлләр туа», – дигән Айваз.