Айваз Садыйров фикеренчә, татар мохитендә объектив бәяләмә язып булмый, даирә чикләнгән

Алып баручы Айваз Садыйров телеграм-канлында кызыклы гына фикерләре белән уртаклашып бара. Ул татар даирәсе танышлыклар белән чикләнгән булуын, татар мохитендә объектив бәянең булмавы турында уйланулары белән дә бүлешкән.

«Татар мохитендә берәр чарага, вакыйгага, шәхескә объектив бәяләмә язу – Рәсәйдә яхшы машина җитештерүгә тиң, ягъни мөмкин түгел диярлек. Нинди генә күренеш яки проект турында фикер булмасын, алар белән бәйле шәхесләргә кагылырга туры килә.

Татар даирәсе чикләнгән. Бер кул кысышу белән. Күп булса, 2-3. Шуңа күрә еш кына бары мактау гына язалар, яки бөтенләй язмыйлар – араларны бозасы килми. Нәтиҗәдә, объектив бәя югала.

Тискәре тәнкыйть ясаучылар юк түгел үзе. Ләкин алар, никтер, гел негативлык байрагын күтәреп йөрү ролен сайлыйлар. Ахыр чиктә, аларның фикерләве дә, позицияләре дә тискәре күренешләрне генә эзләп табуга кайтып кала», – дип аңлата Айваз Садыров.