Айсылу Габдинованың әнисенә мактаулы исем биргәннәр
Зилә Габдинова быел Бөтенроссия «Иң яхшы татар теле һәм әдәбияты укытучысы» конкурсы җиңүчесе булган.
Җырчы Айсылу Габдинованың әнисе Зилә ханым «Татарстан Республикасының атказанган укытучысы» исеменә лаек булган. Ул гомумән алганда 28 ел укытучы булып эшли.
«Әнием 26 ел 116 нчы лицейда рус телле балаларга татар теле укыта. Быел Бөтенроссия «Иң яхшы татар теле һәм әдәбияты укытучысы» конкурсы җиңүчесе булды. Әле 11 - 18 сентябрьдә Ставрополь краенда үтәсе «Туган тел һәм әдәбиятыннан иң яхшы укытучы» конкурсына әзерләнә. Бу бәйге «Россия ел укытучысы» конкурсы кысаларында быел беренче тапкыр үткәрелә. Анда 85 төбәктән туган тел укытучылары катнашачак», – ди Айсылу.
Айсылу сүзләренчә, Зилә ханымга мактаулы исем алуы турында Мәгариф һәм фән министрлыгыннан шалтыратып әйткәннәр.
«Әнием һәрвакыт башка укытучылардан бер адым алдарак барырга тырыша, барлык яңалыкларны җиңел кабул итеп ала. Аның, эшем авыр, хезмәт хакы аз, укучылар, ата-аналар начар, дип әйткәне юк. Бары тик, элегрәк татар теленә карата хөрмәт күбрәк иде, дип уйланганы бар», – ди әнисенең җиңүенә шатланып, Айсылу.