Җырчы Айсылу Габдинова социаль челтәрдәге сәхифәсендә тәмле итеп ит пешергәнен күрсәткән иде. Язылучылары соравы буенча рецепт белән дә уртаклашты.
– 600 грамм ит кирәк булачак. Әлбәттә, кеше санына карап, аны арттырырга мөмкин. Итне 5*5 үлчәмдә яки үзегез теләгәнчә турарга, тик артык калын булмасын. Бераз тәпәләсәгез яхшы булачак.
Итне коры табага салырга, 1 суганны ярымбоҗралап турарга, өстенә 100 грамм атланмай, 100-150 грамм кайнаган су салырга. Кайнап чыккач, сүрән утта 1 сәгать пешерергә. Аннары 1 бал кашыгы шикәр комы, 1 бал кашыгы аш серкәсе, тәменчә тоз, берничә тырнак сарымсак сытарга һәм тагын 1 сәгать каплап пешерергә.
Шикәр комы белән аш серкәсен күбрәк тә салырга була, тәмләп карап өсти аласыз, – дип яза җырчы.
