Татарстанның халык артисты Айгөл Бариева шәһәр урамыннан матур вә зәвыклы күлмәк, башына таҗ киеп атлап барган видеосын социаль челтәргә куйган.
«Бүген кабат таҗымны алып кияргә туры килде. «Татарстан гүзәле-2025» конкурсында катнашучылар һәм элеккеге еллардагы җиңүчеләр белән очраштык. Сагынышканбыз.
Быел 18 гүзәл зат финалга чыкты. Нинди генә тарихлар һәм язмышлар турында тыңламадык. Шәхсән минем өчен – алар барысы да җиңүче. Әмма хәзердән үк жюрига сайларга кыен булачагын аңлыйм. Финал 18 июльдә уза. Мин дә – жюри әгъзасы.
Бу бәйгедә дә минем дәвамчым булуына да шатландым. Мөслимә, 5 бала анасы катнаша. Уңышлар сезгә», – дип яза җырчы.
Узган ел Татарстанның халык артисты Айгөл Бариева «Татарстан гүзәле» бәйгесендә катнашып, «Казан гүзәле» номинациясендә җиңү яулаган иде.
