Татарстанның атказанган артисты Айгөл Бариева әтисе – Камал театры артисты Шамил Бариевны искә ала. Бүген аның вафатына 29 ел.
«Бүген минем өчен моңсу көннәремнең берсе. Әтием киткән көн. 29 ел элек бу көнне минем тормыш үзгәрде дә куйды. Ничә ел үтсә дә, ул яра төзәлми, бары тик аның белән яшәргә өйрәнәсең генә. Ләкин шунысы күңелне җылыта – кая гына барсам да, бөтен җирдә әтиемне һаман да җылы искә алалар, хәтерлиләр, юксыналар…
Урының оҗмахта, рухың шат булсын, әтием», – дип яза ул.
Җырчының «Телеграм» каналын карап баручылар да Шамил Бариевны җылы итеп искә ала. «Хөрмәт итәбез, Айгөл, әтиегезне. Урыннары оҗмахта булсын әти-әниегез, тормыш иптәшегезнең. Бер хәл хәтердә. Сез әтиегез белән радиога килгән идегез. «Институтны тәмамлагач, сез җырчы буласызмы?» – дип сорагач: «Юк, мин җыр укытучысы булам», – дип җавап кайтарган идегез», – дип язып калдырган бер ханым. «Рәхмәт искә төшерүегезгә. Менә сүземдә тормадым шул», – дигән аңа каршы Айгөл Бариева.
Айгөл Бариева әтисе белән әнисен бер-бер артлы диярлек югалткан. 2022 елда җырчыга тагын бер зур хәсрәт кичерергә туры килде – ире Линар Юсиповны җирләде.