Композитор Айдар Тимербаев дусларын җыеп ифтар уздырган. Социаль челтәрдә чыккан видеода күренгәнчә, ифтарга килүчеләр арасында эстраданың танылган артистлары Рифат Зарипов, Марат Мухин, Илдар Хәкимов, Салават Миңнеханов, Ризат Рамазанов, Айрат Ильясов, Алмаз Мирзаянов, Азат Фазлыев һ.б. бар.
Ифтарга килүчеләр арасында башларына кимәгән ир-атлар да шактый. Айдар Тимербаев түбәтәй кимәүчеләргә «бәйләнүчеләргә» җавап итеп, хәзрәткә шул хакта сорау биргән.
«Әлбәттә, түбәтәй безнең халкыбызның гореф-гадәте, әмма дингә бернинди кагылышы юк. Пәйгамбәребез галәйһиссәләм намаз укыганда баш киеме булганны таләп итмәгән, үзе кигән. Намаз вакытында сөннәт гамәл, саваплы эш. Башка вакытта кешенең башында түбәтәй юк икән, моның өчен ачуланырга, каты сүз әйтергә ярамый. Кешене гаепләү, гомумән, кешенең кыяфәтенә тыгылу зур гөнаһ, моңа игътибар бирсәк иде. Уразаларыбызны, изге гамәлләребезне шуның белән юк итмәскә иде. Кешенең күңеле, иманы аның изге эшләрендә күренергә тиеш», – дип җавап биргән Рамил хәзрәт.
Композиторның виртуаль дуслары «тоткан уразаларыбыз кабул булсын», «чакыру өчен рәхмәт», «ураза тотучыларга Аллаһ ярдәм бирсен» кебек комментарийлар калдырган.
«Уразада килеш Рифат, Фирдүс һәм башкалар концерт куя. Ничек көне буе шулай ашамыйча...», – дип аптыраган берәү.