Татарстанның Әгерҗе районында автомобиль юл кырыена төшеп капланган, авариядә 13 яшьлек кыз бала һәлак булган. Бу турыда «Татар-информ» хәбәр итте.
Татарстан Республикасы прокуратурасы белешмәсе буенча, юл-транспорт һәлакәте 6 июньдә 13:25 сәгатьтә Әгерҗе – Красный Бор автомобиль юлында, Иж-Бәйки авылы янында булган.
Hyundai Solaris автомобиле йөртүчесе тизлекне арттырган һәм идарәсен югалткан. Нәтиҗәдә машина юл читенә төшеп капланган.
Автомобильдә тагын өч бала булган. Төрле дәрәҗәдәге җәрәхәтләнгән балаларны хастаханәгә илткәннәр.
Тикшерү эшләре бара, диелә хәбәрдә.