«Әгәр ул башка диндә булса?»: Илсөя Бәдретдинова улы белән җитди темага сөйләшкән
Илсөя Бәдретдинова «Роксана» радиосында кунак булган. Ул анда улы Нариманның әнисеннән нинди киленне кабул итү-итмәве белән кызыксынуы турында сөйли.
«Булачак хатыным миннән әзрәк олырак булса», – ди миңа малай беркөнне. «Ярар, бик әйбәт булыр, сине җитәкләп йөрергә кеше булыр, күңелем тыныч булыр. Әйбәт булыр», – дидем.
«Әгәр бик яшь булса», – ди. «Яшь булса, яныңда яшь хатын инде, ятсаң да, торсаң да – яшь хатын. Шулай ук начар түгел».
«Әгәр ул башка диндә булса», – ди. «Ярар инде, башка дин начармени? Барысы да яхшы, бәйрәмнәребез артачак. Дини бәйрәмнәрне дә бергә үткәрербез», – дип әйттем.
«Әгәр ул кара тәнле булса», – ди. «О, бигрәк әйбәт, балаларыгыз матур булачак», – дидем.
«Берәр нинди чикләү бармы», – ди. «Бар, егет кеше генә булмасын», – дидем.
Мин үзем дә килен булган кеше. Минем кайнанам нык әйбәт иде. Миңа калса, әни, малаена караганда, мине ныграк ярата иде. Шуның өчен, мин нормаль кайнана булырмын, дип уйлыйм.