Африканың 3 иле – Көньяк Африка республикасы, Замбия һәм Комор утраулары президентлары Украинага тынычлык миссиясе белән килергә җыена, дип яза РИА Новости, Rzeczpospolita басмасына сылтама белән.
Көньяк Африка республикасы президенты Сирил Рамафоса җитәкчелегендәге делегация пәнҗешәмбе Варшавага килә, шуннан Киевка юнәлә, диелгән хәбәрдә. Бүген алар Польша президенты Анджей Дуда белән очраша, соңрак Киевта аларны Владимир Зеленский кабул итәчәк.
Көньяк Африка республикасы, берничә Африка иле белән берлектә, тынычлык инициативасы белән чыккан иде. Моны Россия президенты Владимир Путин да хуплады, Украина президенты Владимир Зеленский да каршы булмады. Африка илләре президентлары үз планнарын Украинага да, Россиягә дә тәкъдим итәргә җыена.