Җәен бакча җиләген чиләкләп җыяр өчен, язын ни эшләргә?

Бакча җиләген дөрес иттереп тәрбияләсәң, мул уңыш та җыеп алырга була. Бу турыда киңәшләр сайтында язылган.

Җиләк чәчәк атканчы берничә эшне башкарырга кирәк. 

Башта үсемлекне кисәләр. Иске яфракларын алып ташлыйлар. Алар җиләкнең энергиясен алып утыра. Иске яфракларда авырулар һәм корткычлар да була. Яфракларны йолкып алмагыз, матур итеп кенә кисегез. Үсемлекне бакчага таратып үрчетергә җыенмасагыз, зур җиләкләр үстерергә теләсәгез, мыекчаларны да кисеп алыгыз.  

Җиләкнең төбен йомшартыгыз. Иске мульчаны алып ташлагыз. Бик тирән казымагыз, йомшак тамырларны зарарларга ярамый. Төпләрне йомшарткач, ылыслардан, саламнан яки пычкы чүбеннән яңа мульча җәегез.

Җиләккә ашлама кертергә онытмагыз. Гадәттә, комплекслы ашламалар кулланалар. Аларда азот, фосфор һәм калий була, диелә хәбәрдә.