Бакча уңышыннан кышка әзерләнә торган әлеге аджика артык ачы булмый, ипигә ягып ашарга да тәмле.
Кирәкле яшелчә һәм тәмләткечләр: 2,5 килограмм помидор, 1 килограмм кишер, 1 килограмм баллы борыч, 100 грамм кузаклы ачы кызыл борыч, 200 грамм сарымсак, тәменчә тоз, 1 стакан шикәр комы, 1 стакан көнбагыш мае, 1 стакан 9 процентлы аш серкәсе.
Помидор, кишер, баллы һәм ачы борычларны юып-чистартып иттарткычтан чыгарырга. Аннары кәстрүлгә салып бутап, газ плитәсенә куярга. Кайнап чыккач, тәменчә тоз, шикәр комы, көнбагыш мае һәм аш серкәсе өстәргә. Талгын утта 1 сәгать пешерергә.
Соңыннан сарымсак сытарга һәм тагын 10 минут тирәсе кайнатып алырга.
Әзер аджиканы стериль банкаларга (әлеге рецепт буенча 0,5 литрлы 7-8 банка чыга) тутырып, тимер капкач белән ябарга.
