«Абыйлы-сеңелле үлделәр». Югары Осланда бер хатын абыйсын янгыннан чыгарырга маташкан
55 яшьлек хатын яна торган йорттан башта карт әнисен алып чыккан, аннары абыйсын коткарырга дип кереп, үзе дә янып үлгән.
8 гыйнварда 21.11 сәгатьтә Татарстанның Югары Ослан авылында шәхси йортта янгын чыга. Биредә ике гаилә яши. Йортның янмый торган ягындагы кешеләр үзләре чыгып котыла. Яна торган яктан 55 яшьлек хатын 75 яшьлек әнисен алып чыга. Аннары 50 яшьлек абыйсын эзләргә дип, кабат янгын эченә керә. Абыйсы да, сеңлесе дә ут эчендә калып, һәлак була. Бу турыда Россия Гадәттән тыш хәлләр министрлыгының Татарстан буенча баш идарәсенең матбугат хезмәте хәбәр итте.
Урынга килгән янгын сүндерүчеләрне урамда күршеләр һәм кызы өйдән алып чыккан ана каршы ала. Әни кеше кызының ут эченә кереп китүен, анда улы да калуын сөйли.
Ләкин коткаручылар яна торган йорт эченә керә алмый. Бу вакытта тәрәзәләрдән ялкын ургылып чыга, өй түбәсе дә яна. Янгын күрше якка да, хуҗалык корылмаларына да күчү ихтималы була. Янгын сүндерүчеләр утны сүндергәч, һәлак булган абый белән сеңелнең мәетләрен таба.
«Янгын 72 квадрат метрда иде. Якынча версия буенча, мичне куллану кагыйдәләрен бозу аркасында ут чыккан», диелә хәбәрдә.
