Абрикос кайнатмасы өчен гади һәм ышанычлы рецепт– радиода 2-3 җыр беткәнче әзерләнә!

Бик гади генә итеп абрикос кайнатмасы ясау рецепты https://progorodche.ru сайтында чыкты.

«Абрикос кайнатмасын мин ел саен шушы гади һәм ышанычлы рецепт буенча әзерлим. Мин бу кайнатманы юкка гына «5 минутлык» дип атамыйм – чынлап та, монда барысы да бик тиз: төп кайнату процессы радиода 2-3 җыр вакыты гына. Шуның аркасында абрикосларда витаминнар да, җәйге хуш ис тә саклана», – ди рецептны тәкъдим итүче хуҗабикә.

Кирәк

• 1 килограмм абрикос,
• якынча 500 грамм шикәр.

Шикәр күләмен үз тәмегезгә карап үзгәртсәгез була. Ләкин 1 кг җимешкә 800 граммнан артыгын салырга киңәш ителми – абрикос тәме югала.

Башлап җибәрер алдыннан кәстрүл әзерләп куегыз – иң мөһиме, абрикослар төбенә ябышмасын.

Кәстрүл төбенә 2 кашык су һәм бераз шикәр салып болгатыгыз – «аслык» кебек килеп чыга.

Абрикосларны юып, төшләрен алыгыз, шикәр белән чиратлаштырып, кәстрүлгә тутырыгыз.

Абрикосларның беразы артык өлгергән, беразы катырак булса әйбәт – шундый катнашма кайнатмага куерак һәм кызыклырак консистенция бирә.

Шуннан соң кәстрүлне 3 сәгатькә, ә мөмкин булса – төнгә калдырабыз, абрикослар сок бирсен өчен. Аннары плитәгә куеп, кайнатып чыгарабыз (күбек чыкса – шунда ук җыеп алабыз!).

5 минут буе сүлпән утта кайнатабыз. Кайнап чыкмасын – югыйсә сироп карала, кайвакыт ачы тәм дә барлыкка килә.

Әзер кайнар кайнатманы чиста банкаларга тутырабыз, капкачларын ныклап ябабыз һәм суынырга калдырабыз. Саклау өчен иң яхшысы – подвал яисә кладовка кебек салкын, караңгы урын, диелә киңәштә.