Вакыт белән сыналган борынгы рецепт буенча чын алма кайнатмасын ничек әзерләргә икәнен киңәшләр сайтында яздылар. «Күпме ясасаң да, тиз бетәчәк, чөнки тәме шундый!» – дип ышандыра хуҗабикәләр.
Әчкелтем-татлы, тыгыз сортлар (Антоновка, Симиренко, яки башкасы) алырга кирәк. Алар пешеп таралмый, матур формасын саклый. Моннан тыш, алмаларда С, В1, В6 һәм Е витаминнары, тимер, кальций, магний һәм калий күп. Димәк, бу – гади ризык кына түгел, ә файдалы десерт.
Кирәк булачак ингредиентлар:
- Алма – 1 кг.
- Шикәр – 1,2 кг.
- Су – 370 мл (якынча 1,5 стакан).
- Теләгән очракта – 1 бадьян йолдызчыгы яки бераз дарчин (корица).
Киңәш: Алмаларның кабыгы юка, тапсыз булса – чистартмасаң да була, ул кайнатмага үзгә текстура һәм хуш ис өсти.
Кайнату ысулы:
1. Алмаларны әзерләү
Алманы юып, теләсәгез – кабыгын әрчеп, төшләрен алып, зур-зур итеп телемләп турыйбыз. Бик вакламаска тырышыгыз – пешкәндә алар таралырга тиеш түгел.
- Киңәш: Телемнәре каралмасын өчен, лимон согы сибәргә яки бераз лимонлы суга салып торырга мөмкин.
2. Сироп һәм алмаларны төнгә калдырып төнәтү
Зур кәстрүлдә 700 г шикәрне су белән кушып, кайнап чыгарга куябыз. Сироп ачык, чиста, карамельләнмәгән булырга тиеш. Кайнап торган сиропка алмаларны салып, уттан алабыз һәм 3-4 сәгатькә калдырабыз (теләсәгез – төнгә).
- Лайфхак: Кичен ясап калдырсагыз, тагын да тәмлерәк булачак.
3. Беренче кайнату
Кәстрүлне яңадан плитәгә куеп, акрын утта 5-7 минут кына пешерәбез. Аннары суытырга куябыз – бүлмә температурасында 2-3 сәгать.
- Мөһим: Артык пешермәгез! Алмаларның формасын һәм ялтыравыклы, «пыяла кебек» күренешен саклагыз.
4. Икенче сироп һәм тәмне ачу
Сиропны аерым савытка агызып алабыз, калган 500 г шикәрне өстәп, янәдән кайнатабыз. Сироп куера, кашык артыннан «сузыла» башлый. Шул вакытта алма телемнәрен кире салып, әзер булганчы пешерәбез – телемнәр үтә күренмәле була, сироп тамчысы тәлинкәдә формасын саклый.
- Хуш ис сере: Бу этапта бадьян яки дарчин өстәргә мөмкин. Ул кайнатмага тәм өсти.
5. Банкаларга тутыру
- Кайнатма кайнар килеш стерильләштерелгән банкаларга тутырыла. Банкаларны микродулкынлы мичтә (аз гына су салып, 5 минут тулы көчтә) эшкәртсәгез, уңайлы. Капкачларны кайнап торган суда кайнатып алыгыз.
Әбинең киңәше: Кайнатма суынганчы ук капкач белән ябып куегыз – ул вакытта банкалар нык «тота» һәм кыш буе сакланачак. диелә хәбәрдә.
