Стәрлетамак районының бердәнбер сугыш ветераны Габдрәшит Әһлиуллин олы яшьтәмен дип тормый – машинасы белән үзе идарә итә. Ветеранның машинада җилдергән видеосын «Безнең Башкортостан» сәхифәсенә урнаштырганнар.
Бу – 7нче машинам инде. 2011 елда алган идем, шуннан бирле йөрим. 30 ел элек алган идем права, Аллаһка шөкер, – дип горурланып сөйли Габдрәшит абый.
«Габдрәшит абыйның гомере һәм язмышы Талач авылы белән бәйле. Ул тормыш иптәше белән 5 кыз һәм 1 ул тәрбияләп үстергән. Шулай ук Габдрәшит абый намазын калдырмый, бакча үстерә, гөрләтеп дөнья көтә», – дип язалар ветеран турында хәбәрдә.
Видеоны караучылар бабайга саулык-сәламәтлек, озын гомер теләгән.
«Исән-сау бул, бабай», «Сөйкемле бабай, исән-имин йөрегез», «Афәрин, бабай. Ләкин иминлек каешын эләктергә кирәк», – дип язалар аңа.