«8 яшьлек улы карап торды». Вәхши ана нәни кызына янучан сыеклык сибеп, ут төрткән

Алтайда яшәүче хатын 1,5 яшьлек кызын тереләй яндырып үтергән. Бу турыда Тикшерү комитетына сылтама белән «Вести» каналы хәбәр итте.

Вәхши хатын балага янучан сыеклык сибә һәм ут төртә. Сабый кыз һәлак була. Җинаять эше ачылган.

Фаҗига 20 февральдә иртәнге якта Урожайный бистәсендә була. Биредә яшәүче хатын нәни кызын склад янына алып килә. Шунда ук бала өстенә янучан сыеклык сибә һәм ут төртә. Бу хәлне хатынның 8 яшьлек улы күреп тора. Аннары малай белән хатын кайтып китә.

Кыз фаҗига урынында ук үлә.

Хәзер вәхши ананы тоткарлаганнар. Аңа карата «Аеруча вәхши ысул белән нәни баланы үтерү» маддәсе буенча җинаять эше ачылган.

Тикшерүчеләр ачыклаганча, бу гаиләдә 3 бала үсә, гаилә махсус хисапка куелган. Быел гыйнварда гына бу хатынның ана булу хокукларын чикләгәннәр.

Шулай ук опека органнарына карата да тикшерү оештырылган, диелә хәбәрдә.