«Челнинские известия» корреспонденты «8 Март ир-егете» хезмәтен күрсәтүче егет белән клиент буларак аралашты.
Халыкара хатын-кызлар көне алдыннан бушлай белдерүләр сайтында Татарстанда хатын-кызлар өчен «8 Мартка егет» дигән кызыклы хезмәт пәйда булды. Аның бәясе 10 000 сумнан башлана һәм аннан да югарыракка бар. 8 Мартта дус кызыңа аны чакырасың – ул бәйрәмдә ялгыз хатынның күңелен күрә.
«Челнинские известия» хәбәрчесе номерларның берсенә шалтыратты. Без клиент буларак шалтыраттык – имеш, аны, бәйрәм бүләге итеп, тыйнак, оялчан урта яшьтәге дустыбызга чакырабыз. Номер буенча шалтыраткач, ягымлы ир-ат җавап бирде, соңрак ул үзенең фотосын җибәрде – бик сөйкемле яшь егет.
Белдерүдән күренгәнчә, аның хезмәте 30 000 сумнан башлана. Бу бәягә «клиентның машинасында йөрү», «элеккеге егетенең нинди әшәке булуын тыңлау», «ресторанда ашау», «подъездга кадәр озату» керә. «Тәкъдим пакеты»на урамда йөрү керә, аның маршруты алдан төзелә, анда бару урыннары, сөйләшү темалары турында сөйләшергә мөмкин. Әңгәмәдәш хәтта хатын-кызларга ошаган һәм «дус кыз»га туры килгән шәхси фишкалар исемлеген төзергә тәкъдим итте.
Егет 5 000 сумнан башлый, әкренләп, үз хезмәтләренең бәясен арттыра. Әңгәмә барышында ир Чаллыга да барырга ризалашты. Булачак юлдашының фотосын җибәрүне сорады. Реклама итеп, клиентларының бәяләмәләрен дә җибәрде: «дустым эйфория хәлендә иде», «дустыбызга шундый шәп бәйрәм өчен бик рәхмәтле сиңа, ул бик шат иде», «рәхмәт, матур чәчәк бәйләме, ресторан. Барысы да ошады. Киләсе елда икенче дустыбызга заказ бирәбез», дип язганнар егеткә.
«Бонус» буларак, ул чәчәкләр өчен үзе түли алуын әйтте.
25 яшьлек егет күңелле әңгәмәдәш булып чыкты. Татарстанга әти-әнисе янына килгән. Аның сүзләренчә, хатын-кызларны 18 яшеннән сөендерә башлаган. Барысы да шаяртудан башланды. Дуслары белән шаяртып кына бер кызга чакыралар, һәм бу хобби тамыр җибәрә. Егет хәзер 14 февральдә һәм 8 Мартта белдерүләр калдыра. Һәр бәйрәмгә 2-3 клиент була.
Дөрес, 8 Мартта безнең шалтырату вакытында егет әле буш иде. Күрәсең, шау-шу юк. Бәлки, кызлар егетне алдакчы яки альфонс дип уйлыйлардыр.
«Юк, мошенник түгел. Ватсап буенча паспортымны җибәрә алам, килешү төзи алабыз. Гади тормышта мин маркетинг өлкәсендә эшлим, үзмәшгуль. Альфонс түгел, чөнки минем үз акчам бар. Ә бу – хатын-кызларны язгы бәйрәмдә яки гашыйклар көнендә сөендерү өчен хобби кебек», – диде әңгәмәдәш.
Клиентларның яше 20 яшьтән 45 яшькә кадәр. Егет ханымнарга нәрсә кирәген белә, чөнки психологияне өйрәнгән. Аның фикеренчә, аларга эмоцияләр җитми. Ул актерлык һәм ораторлык осталыгы курсларын да үткән.
Егет язган белдерүдә «интим тәкъдим итмәскә» дип язылган. Әмма сөйләшүдән аңлашылганча, әгәр клиент аңа ошаса, ә клиентка ул ошаса, бу очрашу тагын да зуррак нәрсәгә әверелергә мөмкин. Ул бер шәһәрдәге клиентларының берсе белән «зуррак нәрсәгә әверелгәнен» әйтте – аның белән вакыт-вакыт аралашуын дәвам итә. Ул өйләнмәгән, очрашып йөргән кызы да юк.
Егет шушы хоббие аны булачак яраткан хатыны белән таныштырыр дип өметләнә.
Сүз уңаеннан, егетнең әти-әнисе аның хоббие турында белә. Бу хакта алар шаярталар һәм аның тормышына кермиләр. Ул олы кеше, үзе хәл итәр, диләр.
«Челнинские известия»дан Ольга Степанова язмасы тәрҗемә ителде