Быел яз Голландиядән кайтартылган тюльпаннар булмаячак. Барлык тюльпаннар да диярлек Россиядә үстерелгән һәм кыйммәт булачак, дип яза «Российская газета», Чәчәк сатучылар берлеге рәисе Алексей Антиповка сылтама белән.
«Бу – санкция, коронавирус, башка вакыйгалар белән бәйле түгел. Чынлап та импортны алыштыру булды. Россиядә чәчәк үстерүчеләр берничә йөз исәпләнә», – дигән ул.
Тюльпаннар иң күп сатыла торган чәчәк түгел. Чәчәк базарында иң зур урынны алып торганнары – розалар (49%), хризантемалар (15%), канәферләр (11%), гербералар (8%). Тюльпаннарны башлыча 8 мартта алалар, бу – барлык күләмнең 10% тәшкил итә. Март башында 150 миллион чәчәк сатыла икән – бу һәр хатын-кызга елына 2-3 букет бүләк итәләр, дигән сүз.
Соңгы 5 елда чәчәк үстерү бизнесы 68%ка арткан. 2016 елда 200,8 млн данә үстерсәләр, 2021 елда – 338,9 млн. Элек чәчәкләрне Голландия (34%), Эквадор (33%), Беларусь (9%), Кения (8%), Колумбия (6,6%) сатса, соңгы елларда үзебездә үстерелгәннәр арта бара. Шулай да җирле чәчәкләр барлык күләмнең 17 %ын гына тәшкил итә икән. Голландияне Африка иле Кения һәм Латин Америкасы иле Эквадор кысрыклап чыгарып бара.