Башкортстан табиблары 2 яшьлек малайның гомерен саклап калу өчен тырыша. Аны машина гараж ишегенә китереп кыскан. Бу турыда «Башинформ» хәбәр итте.
Фаҗига Иглин районындагы Акбирде авылында була. Шәхси йорт гаражында 7 яшьлек малай машина руле артына утыра. Якынча белешмә буенча, ул машинаны ручниктан ала, машина хәрәкәт итә башлый. Шул чакта машина каршында булган нәни энесен гараж боксы ишегенә китереп кыса.
Полиция белешмәсе буенча, 7 яшьлек малай машинаны эшләтеп җибәрергә маташа, шул чакта 2 яшьлек энесен таптый. Баланы хастаханәгә илткәннәр. Тикшерү бара.
Хәзер нәни пациентны мультидисциплинар бригада дәвалый. Анда реаниматологлар, нейрохирурглар, лор-табиблар, травматологлар, хирурглар бар.
Баланы хәле бик авыр, дип бәяләнә, диелә хәбәрдә.