«7 кеше үлде, 3 кеше имгәнде». Ялларга гаиләсе янына кайтып баручы журналист кыз һәлак

Фото: https://vk.com/55mvd, Омск өлкәсе буенча Эчке эшләр министрлыгы

16 мартта көндезге берләр тирәсендә Омск өлкәсенең Любин районында авария була. Төмән-Омск юлының 565нче километрында 2 йөк машинасы һәм микроавтобус бәрелешә. Бу турыда Россия Эчке эшләр министрлыгының Омск өлкәсе буенча идарәсе хәбәр итә.

«Вести» каналы белешмәсе буенча, авариядә журналист Анна Никитенко һәлак булган. 33 яшьлек Анна Никитенко «NGS55.ru» порталында эшләгән. Ул ялларга Тюкалинскига гаиләсе янына кайтып бара торган булган.

Якынча версия буенча, «DAF» йөк машинасының алгы тәгәрмәче тишелгән, ул каршы як полосага чыккан, башта «Scania» машинасына, аннары «Toyota» микроавтобусына бәрелгән. Аның салонында 7 пассажир булган.

Бәрелгәннән соң, янгын чыккан, 1 йөк машинасы янып беткән, микроавтобуска зыян килгән.

Авариядә 7 кеше үлде, 3 кеше имгәнде, шул исәптән 15 яшьлек малай, диелә бу хәбәрдә.

Комментарийлар (0)