Рус эстрадасы җырчысы Татьяна Буланова элекке теннисчы һәм эшмәкәр Валерий Рудневка кияүгә чыккан. Ире аның үзеннән 19 яшькә яшьрәк, дип яза СтарХит сайты.
Язылышу тантанасы Санкт-Петербургның Англия яр буендагы данлыклы ЗАГСында булган. Үз вакытында монда Алла Пугачева һәм Филипп Киркоров, Сергей Шнуров һәм Матильда Мозговая язылышкан булган. Бәйрәмгә кияү белән кәләшнең иң якын кешеләре генә чакырылган. Җырчы бу уңайдан шоу ясарга теләмәгән, ә шәхси бәхете турында артык сөйләмәүне хуп күргән.
Кәләш итәк чабуы озын булган ап-ак күлмәктән, ә кияү зәңгәрсу төстәге смокингтан булган.
Мондый мөһим көндә дусты янында булыр өчен, язылышу тантанасына Мәскәүдән Светлана Бондарчук та килгән. Кунаклар арасында җырчының 2 улы да булган.
Бу – Татьяна Буланованың өченче тапкыр кияүгә чыгуы. Аның беренче ире – продюсер Николай Тагрин, ул аның белән әле дә булса яхшы мөнәсәбәтләрдә. Икенче ире футболист Владислав Радимов, алар да шушы ЗАГСта язылышкан булган. Кызганыч, бу пар җәнҗал чыгарып аерылыша һәм хәзер «Зенитның» элекке йолдызы улы һәм элекке хатыны белән сирәк аралаша.