50 яшьлек ата улы белән тимер акча җыйган коллекционерны үтерүдә гаепләнә
Үтерүдә шикләнүчеләр Киров районындагы гаражда тоткарланган.
Совет районы суды нумизмат Евгений Тарасовны үтерүдә гаепләнгән аталы-уллы Юрий һәм Кирилл Гаврилюкларны кулга алды. Алар Украина гражданнары. Әти кешегә 50, улына 26 яшь.
«Татар-информ» 20 декабрьдә 60 яшьлек нумизматның үз фатирында атып үтерелүен хәбәр иткән иде.
Алар Киров районындагы гаражларның берсендә тоткарланган. Гаражда нумизматның тиенле акчаларны туплап барган альбомы да табылган. Гаврилюкларның фатирында 150 патрон һәм пистолет магазины табылган.
Юрий Гаврилюк Тинчурин урамындагы базарда вак-төяк белән сату иткән. Нумизмат белән ул шунда танышкан булса кирәк. Улы исә бухгалтер булган.
Суд аларны 19 февральгә кадәр сак астына алды.