44 яшьлек хатын 19 яшьлек кызын балта белән чапкан һәм ишегалдында күмеп куйган
Бу хатын ирен үтергән өчен төрмәдә утырып чыккан булган.
17 сентябрьдә Төмән шәһәренең Пролетарская урамындагы шәхси йортларның берсендә бер кызны вәхшиләрчә үтергәннәр. Бу турыда Россия Тикшерү комитетының Төмән өлкәсе буенча Тикшерү идарәсенең матбугат хезмәте хәбәр итте.
Әлеге хәл турында 15 декабрьдә генә билгеле булган. Җинаятьчеләрне эзләү хезмәткәрләре һәм тикшерүчеләр кызны үтерүдә шикләнелүчене табып, тоткарлаган. Ул беркайда да эшләмәүче, моңа кадәр ирен үтергән өчен хөкем ителгән 44 яшьлек хатын булып чыккан.
Тикшерү версиясе буенча, исерек хатын 19 яшьлек кызын балта белән чапкалап үтерә. Ул баласына бик күп тапкыр балта белән суга. Кыз урында ук һәлак була.
Җинаять эзләрен яшерү өчен, ул бергә яши торган ире белән кызының мәетен ишегалдында күмеп куя.
«Үтерү» маддәсе буенча җинаять эше ачылган.
URA.RU сайты хәбәр иткәнчә, бу гаиләнең туганы җинаять турында полициягә хәбәр итә. Ул кызны анасы үтерү ихтималын, аның төрмәдә утырып чыккан кеше булуын сөйли. Полиция хезмәткәрләре бакчада җиргә күмеп куелган мәетне таба.
44 яшьлек хатын кызын үтерүен таный. Ул кызы һәм бергә яши торган ире арасында мөнәсәбәтләр бардыр дип көнләшкән.