43 яшьлек ир-атны урлап урманга алып китеп, үзен күмәр өчен кабер казытканнар
Ике бала атасыннан йөзләрчә мең сум акча таләп иткәннәр.
Башкортстанның Дәүләкән шәһәрендә бер ир-атка үзенә кабер казытканнар. 43 яшьлек ир-атның ике баласы бар. Аннан акча талауда шикләнеп ике кешене тоткарлаганнар. Бу турыда Башкортстан буенча Эчке эшләр министрлыгы хәбәр итте.
Дәүләкән шәһәрендә яшәүче 20 һәм 21 яшьлек егетләр 43 яшьлек ир-атның акчасы күп булуын белеп ала. Егетләр үзләре беркайда да эшләми. Аларның берсе көрәшче. Бу егетләр 43 яшьлек ир-аттан бурычка 300 сум акча сорый, ләкин танышлары аларга бурыч бирми. Шуннан соң алар олырак ир-атның артыннан күзләп йөри башлый, тагын да күбрәк акча таләп итәләр.
Бер көнне егетләр аны саклап торалар һәм урлап урманга алып китәләр. Ир-атның башына пистолетка охшаган әйбер терәп куялар. Аңа үзенә кабер казырга кушалар. Куркып калган ир-ат таләп ителгән сумманы табарга вәгъдә бирә. Ирне җибәрәләр.
Шуннан соң ул үзе бу егетләрдән качып йөри башлый. Берничә көннән аның машинасын җимерәләр һәм ир-ат полициягә мөрәҗәгать итә.
Полиция хезмәткәрләре план төзи. 43 яшьлек ир-ат җинаятьтә шикләнелүчеләр белән кабат очрашырга тиеш була. Аны полиция хезмәткәрләре саклап тора. 10 мең акча тапшырганнан соң, егетләрне кулга алалар.
«Берничә кешедән торган төркем белән көчләү гамәлләре кулланып талау» маддәсе буенча җинаять эше ачылган. Бу маддә буенча җиде елга кадәр иректән мәхрүм итү яный.
Җинаятьтә шикләнелүчеләр хәзер кулга алынган. Дәүләкән районы полициясе җинаять эшен тикшерүне дәвам итә.