9 мартка каршы төндә Украина хәрби көчләре 4 төбәккә күпсанлы дрон һөҗүмнәре ясады. Оборона министрлыгы хәбәр итүенчә, барлыгы 47 пилотсыз очкыч бәреп төшерелгән: Белгородта – 1, Курскида – 2, Волгоградта – 3, Ростов өлкәсендә – 41.
Курскида пилотсыз очкычларның берсе сырхауханә түбәсенә төшеп шартлаган. Корбаннар юк. Сырхауханәдәге авыруларны һәм персоналны башка учреждениеләргә эвакуацияләгәннәр, дип хәбәр итә губернатор Старовойт.
Дроннар Таганрогтагы авиация предприятиесенә һөҗүм ясарга теләгән, дип хәбәр итә МЭШ. Анда янгын чыккан, тиз арада сүндергәннәр. Ростов өлкәсе губернаторы Василий Голубев 41 дрон бәреп төшерелүе, бер МЧС хезмәткәре яралануы турында хәбәр итте.
Дрон очкан тавышлар, шартлаулар 1 сәгать тирәсе дәвам иткән.
Кичә, 8 мартта, Белгород өлкәсенә 3 дрон һөҗүме вакытында 2 кеше һәлак булган иде.