32 яшьлек хатын уникенче баласын тапкан
Екатерина беренче баласын тәртип буенча - кияүгә чыгып бер елдан соң тапкан.
Екатеринбург шәһәрендә урнашкан Аналар һәм балаларны яклау үзәге табиблары гадәти булмаган очракта бала таптырган. Свердловск өлкәсенең Тугулым районындагы Верховино авылында яшәүче хатын уникенче баласын тапкан. Әни кешегә әле 32 яшь кенә. Кыз бала исән-сау туган. Бу турыда Провинция сайты хәбәр итте.
Сабыйның авырлыгы - 3270 грамм, буе - 52 см. Әни кеше дә үзен яхшы хис итә. Бәхетле әти белән әни — Екатерина һәм Янис Кириченко сабыйга Виктория дип исем кушалар. Өйдә аның 4 абыйсы, 7 апасы көтеп тора.
Бу турыда Свердловск өлкәсенең Асбест шәһәре думасы депутаты Наталья Крылова ВКонтакте челтәрендә язган.
Екатерина Кириченко беренче баласын 19 яшендә таба. Барысы да тәртип буена, Екатерина баласын кияүгә чыгып, бер елдан соң тудыра. Хәзер олы уллары Максимга 13 яшь. Виктория туганчы, бу гаиләдә кече бала булган Анатолийга хәзер бер яшь. Аңа кадәр игезәкләр Лев һәм Виталина — аларга 2,5 яшь. Тагын 3,5 яшьлек Валерия, 5 яшьлек Яна, 6 яшьлек Вероника, 7 яшьлек Николай, 9 яшьлек Милана, 10 яшьлек Алиса һәм 11 яшьлек Ева бар.
