30 августтагы бәйрәм чаралары: 1000 гармунчы, ат чабышы, Дима Билан һәм «Елмай»

Ат чабышлары, гармунчылар бәйрәме һәм опера фестивале

Казан халкы һәм кунаклары өчен 30 августка зур бәйрәм программасы әзерләнде, дип сөйләде эшлекле дүшәмбедә Башкарма комитет җитәкчесе урынбасары Гүзәл Сәгыйтова.

Программа иртәнге 10.00 сәгатьтә «Урам» экстрим-паркында башлана. Монда шул ук исемдәге алтынчы урам культуралары фестивале узачак.

Казан Кремле территориясендә шул ук вакытта татар эстрадасы башкаручылары, шулай ук «Yummy music» лейблы резидентлары катнашында «ДәртФест» заманча татар мәдәнияте фестивале башланачак.

Камал театры каршындагы мәйданга 11.00 сәгатьтә бөтен республикадан 1000нән артык гармунчы җыелачак. Монда «Уйнагыз, гармуннар!» узачак. 13.00 сәгатьтә шул ук мәйданчыкта эшләүче яшьләрнең «Безнең заман» фестиваленең гала-концерты башлана.

Кабан күле буенда 12.00 сәгатьтән «Милли кием» халык костюмы фестивале, концерт, ярминкә, Кабан күле турындагы китапны тәкъдим итү, лекцияләр һәм экскурсияләр узачак.

Каюм Насыйри җәяүлеләр урамында 13.00 сәгатьтә 500дән артык халык жанрындагы җырчылар һәм биючеләр катнашында «Казан сөлгесе» фестивале ачыла.

Казан ипподромында 14.00 сәгатьтә ат спорты бәйрәме башлана, аның программасында – ат чабышлары һәм сәнгать осталарының концерт программасы.

Игенчеләр сарае каршындагы мәйданда 19.30да ачык һавада «Казан көзе» опера фестивале ачыла. Сәхнәдә шул исәптән Мариин театры солисты Мария Баракова да чыгыш ясаячак.

Моннан тыш, бәйрәм чаралары гадәттәгечә Горький паркында узачак. Анда җиңел атлетика кроссы, шахмат буенча турнир, баскетбол, мини-футбол буенча ярышлар һәм йога буенча ачык дәрес планлаштырылган.

Тагын бер төп мәйданчык – «Казан» гаилә үзәге. Анда 10.30да төп сәхнәдә республиканың барлык районнарыннан 45 пар никахларын теркәячәк. Сәгать бердән St. рэперы катнашында «Два Кремля» мотофестивале узачак.

Казан Ратушасында Казанның мактаулы гражданнарын хөрмәтләячәкләр

Казан Ратушасында бу көнне шәһәрнең мактаулы гражданнарын хөрмәтләячәкләр. Быел алар – Россия вице-премьеры Марат Хөснуллин һәм «Горводзеленхоз» Тресты МУП идарәчесе Роза Җаббарова. Мондый инициатива белән Татарстан башкаласы мэры Илсур Метшин чыгыш ясады, Казан шәһәр Думасы аны хуплады.

Хөснуллин ярдәме белән, Казанда тузган торакны бетерү программалары гамәлгә ашырыла, яңа торак микрорайоннар, мәдәни һәм спорт объектлары төзелә, шәһәрдә истәлекле объектлар: Кол Шәриф мәчете, Меңьеллык мәйданы, Миллениум күпере төзелә, Казан метрополитенының беренче 5 станциясе һәм башка объектлар файдалануга тапшырыла.

«Марат Шакирҗанович министр вазифасында эшләгәндә республикада федераль акчалар, инвестицияләр, беренче чиратта, Татарстанның Торак-коммуналь хуҗалыгын үстерү комплекслы программасына җәлеп ителде. Марат Шакирҗановичның югары профессионализмы, стратегик фикерләве, новаторлык идеяләре хаклы рәвештә иң югары дәрәҗәдә бәяләнде», – дип билгеләп үтте Метшин Казан шәһәр Думасының XXXI сессиясендә.

«Горводзеленхоз» 160тан артык парк һәм скверга хезмәт күрсәтә, аларның гомуми мәйданы 550 гектар тәшкил итә.

«Роза Шәрифулла кызы республика башкаласын төзекләндерүгә, аның табигый-рекреацион каркасын үстерүгә зур өлеш кертте... Аңа 500дән артык хезмәткәрле тотрыклы һөнәри коллектив формалаштырылган, алар атнага 7 көн, елына 365 көн, теләсә нинди һава торышында шәһәребез файдасына эшли, аны тагын да матуррак итәргә һәм төзекләндерергә омтыла», – диде Метшин.

Кичәнең хэдлайнерлары – Дима Билан һәм «Братья Грим»

17.30да бәйрәмнең иң көтелгән өлеше булачак – шәһәр һәм Республика көненең төп сәхнәсендә концерт башлана, анда Казан шәһәр филармониясе артистлары, «Станция МИР» фестивалендә катнашучылар, җырчы Фәүзия һәм Казан башкаручысы «Дышать» чыгыш ясаячак.

Ә «десерт»ка, казанлылар һәм Татарстан башкаласы кунаклары өчен, танылган Россия җырчысы Дима Билан чыгышын әзерләде. Кичнең хэдлайнеры шулай ук «Братья Грим» төркеме булачак.

«Һәм, ниһаять, 22.00 сәгатьтә Казансу акваториясе өстендәге күк йөзен зур салют бизәячәк, аны ГИМС үзәгеннән Миллениум күперенә кадәр яр буендагы теләсә кайсы яктан күзәтеп булачак», – дип йомгаклады Гүзәл Сәгыйтова.

«Махсус хәрби операциядә катнашучыларга игътибар бирергә»

Шәһәр һәм Республика көнендә махсус хәрби операция ветераннарына, сугышчыларның гаилә әгъзаларына аерым игътибар биреләчәк. Мондый йөкләмәне Татарстан Республикасы Хөкүмәте Йортында узган киңәшмәдә Рөстәм Миңнеханов бирде. Татарстан Рәисе сүзләренчә, төбәкнең төп бәйрәмендә алар республика ярдәмен тоярга тиеш.

«Бәйрәмгә әзерлек кысаларында муниципаль берәмлекләр башлыкларына, мәдәният министрлыгына һәм бу вакыйга җәлеп ителгән башка министрлыкларга безнең ветераннарга һәм хәрби операциядә катнашучыларга аерым игътибар бирергә. Аларның гаиләләре турында онытмаска», – дип игътибар юнәлтте ул.

Шулай ук республика җитәкчесе бәйрәм чараларын иң югары дәрәҗәдә оештырырга өндәде һәм барлык куркынычсызлык таләпләрен төгәл үтәүне таләп итте.

«Киров дамбасыннан Миллениумга кадәр яр буеның бердәм линиясе барлыкка киләчәк»

Шәһәр һәм Республика көнендә Казанда яңа «Елмай» балалар паркы ачылачак.

«Елмай» паркы Татарстанда балалар өчен иң масштаблы ачык пространство булачак, ул Казансуны үстерү стратегиясе кысаларында гамәлгә ашырыла», – дип билгеләп үтте Башкарма комитет җитәкчесе урынбасары.

30 августта яңа паркта программаны «Әйбәт» һәм «Архидети» иҗат хәрәкәте резидентлары тәкъдим итәчәк, кафеда кулинария мастер-класслары узачак, балалар китап кибете ачылачак.

«Яр буенда эшләр яхшы темпта бара, өлгерергә кирәк әле. Даими рәвештә, атна саен без анда штаб уздырабыз, ниндидер карарлар кабул итәбез. Бездә яр буеның Бердәм линиясе барлыкка киләчәк – Киров дамбасыннан Миллениумга кадәр», – дип билгеләп үтте Казан мэры Илсур Метшин.

Шәһәр һәм Республика көнендә Казанда кайбер юлларда хәрәкәт чикләнәчәк

Бәйрәм көнендә шәһәрдә кайбер юл участоклары буенча хәрәкәт вакытлыча туктатылачак.

30 августта көн дәвамында Декабристлар урамыннан Әбсәләмов урамына кадәрге участокта Сибгат Хәким урамы һәм «Казан» гаилә үзәге янындагы парковка зонасы ябылачак.

7.00 дән 22.00гә кадәр юллар ябылу Мәрҗани, Каюм Насыйри һәм Зәйни Солтан урамнарына кагылачак.

13.00 сәгатьтән 17.00 сәгатькә кадәр Кремль урамында һәм 1 Май мәйданында Астрономия урамына кадәр чикләүләр гамәлдә булачак.

«Татар-информ»нан Александра Давыдова язмасы тәрҗемә ителде