3 яшькә кадәрге балаларга ана капиталыннан түләү бирү өчен бер көн билгеләнгән. Татарстанда мондый түләүне 4,5 мең гаилә ала. Бу турыда «Челнинские известия» яза.
2023 елның июненнән 3 яшькә кадәрге бала өчен ана капиталыннан түләүне бөтен кешегә бер көнне – һәр айның 5нче числосында китерәчәкләр. Бу көнне ата-аналарга алдагы ай өчен акча бирелә. Яңа дата беренче тапкыр май пособиесе өчен кулланыла һәм 5 июньнән башлана.
Быелдан 3 яшькә кадәрге балалар өчен, беренче баланы да кертеп, бу түләүне бөтен балага бирәләр. Моңа кадәр ата-аналар бу түләүне икенче балага гына ала иде.
3 яшькә кадәрге бала өчен ана капиталыннан түләүне Татарстанда яшәүче 4,5 мең чамасы гаилә ала. Ул кереме бер кешегә ике яшәү минимумыннан кимрәк булган гаиләләргә бирелә, мәшгульлек һәм милек турында өстәмә таләпләр куелмый.
Түләүне алу өчен Социаль фондка гариза бирергә кирәк. Моны дәүләт хезмәтләре порталында, СФР сайтында, Социаль фондның клиент хезмәтендә яки МФЦда эшләп була.
Айлык түләү күләме балалар өчен төбәктәге яшәү минимумына тигез. Ана капиталыннан түләү гаиләгә елына бер тапкыр билгеләнә, түләүне дәвам итү өчен, кабат Социаль фондка мөрәҗәгать итәргә кирәк, диелә хәбәрдә.