3 айлык баласын үтергән әнине 40 елга төрмәгә утыртканнар
Ана өч айлык сабыйны кыйнаган һәм ачтан интектергән.
Американың Техас штатында яшәүче хатын-кыз 3 айлык улын үтергән өчен 40 ел төрмәгә хөкем ителгән. Бу хакта Mirror басмасына сылтама белән «Рен-ТВ» сайты хәбәр итә.
Джей Джей исемле сабыйны 2023 елның 29 ноябрендә Уэйко шәһәрендәге кунакханәдә үле килеш тапканнар. Ачтан үлгән баланың мәете яткан бүлмәдә чи ит, пычаклар һәм наркотиклар булган. Шунда ук сабыйның 3 яшьлек апасын да тапканнар, кызны коткарып кала алганнар.
Кунакханә номерында балаларны ашату өчен яраклы ризык табылмаган, бүлмәдә бары тик соклар һәм җиләк-җимеш кебек кабымлыклар гына булган. Моннан тыш, суд-медицина экспертлары 3 айлык сабыйның организмында наркотиклар булуын ачыклаган.
34 яшьлек Скайлинн Терк баласын үтерүен, аның тәненә җәрәхәтләр ясавын һәм наркотиклар саклавын таныган. Суд хатынны, балага зыян китергән һәм үтергән өчен, 40 елга ирегеннән мәхрүм иткән. Ул 20 елдан соң гына шартлы рәвештә вакытыннан алда азат итү турында сорап гариза бирә алачак.
