29 яшьлек егет телевизор пульты өчен энесенә пычак кадаган

Төмән өлкәсендә 29 яшьлек егет бертуган энесен пычак белән яралаган. Телевизор карарга комачаулаган өчен, бу ир-ат энесенә пычак белән ташланган. Бу турыда Эчке эшләр министрлыгы идарәсенә сылтама белән «АиФ» хәбәр итте.

Фаҗига буласы көнне абыйлы-энеле ике ир-ат спиртлы эчемлекләр эчеп утыра. Шуннан талашып китәләр. Алар телевизор пультын бүлешә алмый. Абыйсы телевизор карыйсы килә, энесе исә сүндерергә маташа.

Талаша торгач, олырак ир-ат кухняга чыгып пычак ала һәм туганына берничә тапкыр кадый. Бу вакытта фатирда әниләре дә була. Ул бу хәлне күреп тора. Тик улларын аера алмый. Ана ашыгыч ярдәм чакыра. Имгәнгән ир-атны хастаханәгә алып китәләр.

Табиблар бу ир-атка авыр җәрәхәт ясалган дип тапкан һәм полициягә хәбәр иткәннәр. Хокук саклаучылар олы туганны тоткарлаган. Аңа карата җинаять эше ачылган. Бу кешене ун елга ирегеннән мәхрүм итүләре ихтимал.