Башкортстанда 29 бала тәрбияләүче ир хәрби операциягә киткән.
Күп балалы ата сүзләренчә, аның 2 улы да хәзер хәрби операция зонасында.
«Читтә кала алмадым. Анда яшьләр сугыша, аларның һәркайсы минем улым була ала иде. Безнең 2 улыбыз да хәзер хәрби операциядә. Ярдәм итмәскә хакым юк. Ватанымны, балаларымны һәм яраткан хатынымны яклап чыгам. Аларга кайтырга вәгъдә итәм!» – дигән Вахид.
Благовещенск районы администрациясе башлыгы Анна Карабанова сүзләренә караганда, Вахид Вәлиев һәм аның хатыны Ирина Вервельская 29 бала тәрбияли, һәм алар – үрнәк гаилә. 2021 елда алар Башкортстанда лаек гаилә парларына бирелә торган «Ата-ана батырлыгы» дәүләт бүләген алган. Хатыны Ирина «Хатын-кыз – Ел директоры» Бөтенроссия конкурсында җиңүче булган.
«Гаилә башлыгы Вахид Оборона министрлыгы белән контракт төзергә карар кабул итте. Аңа 57 яшь, мондый карар аның гаиләсенә җиңел бирелмәде, әмма ул патриотизм һәм гражданлык бурычыннан чыгып эш итте», – дип яза Карабанова социаль челтәрдә.