26 яшьлек актер Ренат Кафиятуллин фитнес-клубта үлгән
Бассейн янында ятучы артистны төнге уникенче яртылар тирәсендә табалар.
Мәскәүнең Ангара урамында урнашкан фитнес-клубта 26 яшьлек актер Ренат Кафиятуллин вафат булган. Бу турыда РЕН ТВ каналы хәбәр итте.
Якынча мәгълүматлар буенча, кичә төнге уникенче яртылар тирәсендә бассейн янында кеше ятуын күреп алалар. Табиблар аңа беренче ярдәм күрсәтеп карый, тик ул барыбер үлә. Хәзер егетнең үлеменең сәбәпләре ачыклана.
Ренат бассейнда йөзә һәм бераздан аның хәле китә. Әлеге мизгелне видеокүзәтү камерасы төшереп алган.
Ренат Кафиятуллин 2015 елда заманча сәнгать институтының актерлык факультетын тәмамлый. Вячеслав Спесивцевның яшьләр театрында эшли. «Преступление и наказание» спектаклендә Порфирий Петровичны, «Ревизор»да Добчинскийны һәм башка зур рольләрне башкара.
- 22 сентябрьдә актер Владимир Конкинның 32 яшьлек кызы София дә шундыйрак шартларда вафат булган иде.