25 яшьлек егетнең йөрәгеннән ике энә алганнар

Благовещенск шәһәрендә яшәүче 25 яшьлек ир-атның йөрәгеннән ике энә алганнар. Амур өлкәсенең клиник хастаханәсе табиблары уникаль операция ясаган. «Вести» каналы шул хакта хәбәр итте.

Ир-атның күкрәге авырта башлый. Шуннан соң ул табибларга мөрәҗәгать итә. Аның зарын тыңлагач, табиблар эшнең нидә икәнен аңлап ала. Егет ята торган караватта кемдер энә төшереп калдырган һәм шул энә аның тәненә кереп кадалган.

Төбәктәге клиник хастаханәнең инстаграмдагы сәхифәсендә хәбәр ителгәнчә, хирурглар 25 яшьлек егетнең йөрәгеннән ике энә кисәге ала.

Операция бик катлаулы була. Беренчедән, йөрәк карынчыгына кан сауган, металл предмет исә йөрәк алдындагы перикардта ята. Бу — яшь ир-атның тормышы өчен бик зур куркыныч тудыра. Ир-атның йөрәгендәге энәне табу катлаулы була, ләкин табиблар командасы уңышлы операция уздыра.

Бер атнадан соң егетне хастаханәдән чыгаралар, хәзер аның сәламәтлегенә куркыныч янамый, диелә бу хәбәрдә.