24 яшьлек егет 47 яшьлек хатынның корсагына пычак кадап үтергән

Башкортстанның Чишмә районында 47 яшьлек хатын-кыз мәете табылган. Бу хатынны таныш ир-аты үтергән дип шикләнәләр. Шөңгәккүл авылындагы тулай торакта булган фаҗига турында «Башинформ» агентлыгы хәбәр итте.

Тулай торактагы бүлмәдә пычак белән кадап үтерелгән хатын-кыз мәете 14 декабрьдә табылган. Әлеге факт буенча Чишмә районындагы Тикшерү комитеты хезмәткәрләре җинаять эше ачкан.

Тикшерүчеләр версиясе буенча, фаҗига булган көнне мәрхүмә хатын янына 24 яшьлек танышы килә. Алар бергәләп спиртлы эчемлекләр эчеп утыра. Шуннан талаша башлыйлар. Кунак егет фатир хуҗасының аркасына һәм корсагына пычак белән кадый. Шуннан соң ишекне ватып чыгып кача. Әлеге тавышка күршеләре килеп җитә. Мәрхүмә хатын мәетен күреп алгач, алар полициягә хәбәр итәләр.

Үтерүдә шикләнелүче егет тоткарланган. Ул үз гаебен тулысынча таный. Аны сак астына алалар. Җинаять эшен тикшерү дәвам итә, диелгән әлеге хәбәрдә.