2025 ел ахырына кадәр пенсионерларны берничә сизелерлек үзгәреш көтә, аерым алганда, тормыш шартларына бәйле рәвештә пенсия статусы үзгәрүче кешеләрнең пенсияләре арта. Бу хакта РИА Новости агентлыгына Дәүләт Думасы депутаты Алексей Говырин («Бердәм Россия») сөйләгән.
«2025 ел ахырына кадәр пенсионерларны Россия Хөкүмәтендә һәм Социаль фондта рәсми рәвештә игълан ителгән берничә сизелерлек үзгәреш көтә. Октябрьдә хәрбиләр һәм көч структураларында эшләүчеләрнең пенсияләре артты – аның күләме гамәлдәге хәрби хезмәткәрләрнең акчалары арту белән беррәттән 7,6 процентка үсте. Бу карар армиягә генә түгел, Эчке эшләр министрлыгы, Росгвардия һәм башка көч структуралары хезмәткәрләренә дә кагыла. Акчалар автомат рәвештә исәпләнде, һәм инде октябрь түләүләре яңа коэффициентны исәпкә алып килә», – диде Говырин.
Аның сүзләренчә, гомуми индексацияләрдән тыш, тормыш шартларына бәйле рәвештә пенсия статусы үзгәргән кешеләрнең дә ел ахырына кадәр акчалары артачак, мәсәлән, 80 яшен тутыручыларның иминият пенсиясенә билгеләнгән түләү күләме 2 тапкырга үсә. Бу түләүләр дә автомат рәвештә арттырыла.
«Шулай ук, беренче тапкыр инвалидлык билгеләнгән гражданнарга тиешле пенсия исәпләнә, беренче төркемдәгеләргә аларны карау өчен өстәмә дә каралган», – ди сәясәтче.
Говырин сүзләренчә, эшләүче пенсионерлар өчен хезмәт эшчәнлеген туктату вакыты мөһим булып кала: Социаль фонд кешенең эштән китүе турында мәгълүмат алуга, аның пенсиясе ел башыннан җыелган барлык артуларны исәпкә алып индексацияләнә, бу исә пенсионерга, хезмәт эшчәнлеге чорында кулланылмаган барлык тупланган индексацияләрне исәпкә алып, югары пенсия ала башларга мөмкинлек бирә.
«Моннан тыш, социаль өстәмә түләү механизмы да саклана: әгәр пенсионерның түләүләрнең һәм ташламаларның барлык төрләрен дә кертеп саналган җыелма кереме конкрет төбәктә билгеләнгән яшәү минимумыннан түбәнрәк булса, Социаль фонд җитмәгән өлешен автомат рәвештә өстәп түли», – диде парламентарий.
Аның фикеренчә, даими индексацияләрдән тыш, декабрь түләүләре мәсьәләсе дә актуаль булып кала. Социаль фонд, традиция буенча, пенсия түләүләре Яңа елның беренче көннәренә туры килгән кешеләргә гыйнвар өчен пенсияләрне алдан күчереп куя.
Говырин аңлатканча, бу – гражданнар Яңа ел бәйрәмнәренә кадәр акча алсын өчен эшләнә, һәм 2025 елда да мондый практика сакланачак: пенсия алу датасы 1-9 гыйнварга туры килгән пенсионерлар аны декабрь ахырында алачак, әмма түләүләрнең төгәл срокларын, гадәттәгечә, Социаль фонд айның соңгы ункөнлегендә игълан итәчәк.
«2025 елның калган айлары инде расланган индексацияләр һәм төзәтмәләр нигезендә дәвам итәчәк. Акчаларны планнан тыш арттыру турында яңа карарлар әлегә кабул ителмәде, әмма элек каралган барлык чаралар илнең күпчелек пенсионерларының керемен сизелерлек арттырачак», – дигән депутат.