23 майда Тверь өлкәсенең Старица шәһәрендә яшәүче 17 яшьлек кызның температурасы күтәрелә, һәм ул «ашыгыч ярдәм» чакырта. «ВКонтакте»дагы «Тверская станция скорой помощи» төркеме хәбәр иткәнчә, чакыру буенча килгән фельдшер кызның бала таба башлаганын шундук аңлап ала.
Балигъ булмаган кызның тулгаклары башланган була инде, тик кыз авырлы булуы хакында үзе белмәгән дә. Фельдшер Юлия Филиппова тиешле ярдәм күрсәтә, якынча 1 кг авырлыктагы, җитлекмәгән малай туа. Әни белән баланы Тверьгә өлкә перинаталь үзәгенә алып китәләр, дип яза «ТИА Новости» сайты.
